*

Bílar 25. mars 2014

Svíakóngur með bíladellu

Í bílskúr Karls Gústafs, konungs Svíþjóðar, má finna ýmsa sportbíla frá ýmsum tímum.

Karl XVI Gústaf Svíakonungur er mikill bílaáhugamaður og hefur safnað fjölmörgum bílum um ævina. Í hinum konunglega bílskúr hans, sem er í gömlu hesthúsi við konungshöllina í Stokkhólmi, er fjöldi allskonar bíla og er verðmæti flotans talið í tugum milljóna sænskra króna. Þetta kemur fram í sænska dagblaðinu Expressen.

Í bílskúr kóngsins eru Pontiac Tempest frá 1966, De Tomaso Pantera frá 1971, Porsche 911 frá 1987 og annar slíkur frá 1973. Þá má einnig nefna Ford Mustang Shelby frá 1966, AMC Cobra frá 1966, Volvo PV60 frá 1946 og loks Mercedes-Benz 500.

Þá á kóngurinn einnig nýja bíla frá Saab og Volvo sem hann notar dags daglega. Mismunandi er hvort eldri og verðmætari bílar kóngsins eru á númerum eður ei en hann mun sjálfur stýra því af miklum áhuga hvaða bílar eru skráðir í þetta og hitt skiptið að sögn Expressen m.a. til að spara tryggingar og skatta.

Fjallað er um bílasafn Karl Gústafs í Bílablaðinu sem fylgdi Viðskiptablaðinu. Áskrifendur geta nálgast blaðið hér að ofan undir liðnum tölublöð.

Stikkorð: Svíþjóð  • Karl Gústaf