Landsnet hefur fengið Unimog trukk af gerðinni U4000 til umráða. Hann er með fjögurra strokka, 218 hestafla BlueTec dísilvél sem uppfyllir Euro 5 mengunarreglugerðina. Hann kemur á 20” felgum og úrhleypingabúnaði fyrir loftþrýsting í hjólabörðum sem stjórnað er með rofa úr mælaborði. Þessi búnaður er nauðsynlegur til þess að bíllinn fái meira flot á snjó og þar með meira veggrip.
Trukkurinn er með driflæsingum að framan og aftan og yfirþrýstingur er á hásingum svo vatn kemst síður inn í þær. Bíllinn er með 160 lítra olíutank og dráttargetan er níu tonn. Vinnuflokkar Landsnets eru alltaf í viðbragðsstöðu.
Það þarf harðgera menn, kunnáttu, skipulagningu og aflmikil tæki til að sinna þessum skyldum, jafnvel í mörg hundruð metra hæð uppi á hálendinu í aftakaveðrum og oft við hættulegar aðstæður. Raforkuflutningsnetið er víðfeðmt og liggur um fjöll og firnindi.
Alls eru háspennulínur Landsnets ofanjarðar um 3.000 km að lengd og drjúgur hluti er á hálendinu þar sem allra veðra er von og snjósöfnun getur orðið mikil. Stundum vinna menn að viðgerðum á línum við alls kyns aðstæður í allt að 40 metra hæð.
Nánar er fjallað um málið í Bílablaðinu, fylgiriti Viðskiptablaðsins. Áskrifendur geta nálgast pdf-útgáfu af blaðinu með því að smella á hlekkinn Tölublöð.
