*

Matur og vín 8. nóvember 2017

Tvítugur köttur í fullu fjöri

Grái Kötturinn fagnar 20 ára afmæli um þessar mundir en af því tilefni er boðið í afmælispönnukökupartý.

„Grái kötturinn opnaði kl. 17 þann 29. október 1997. Þá var hann opinn í klukkutíma og við fengum einn viðskiptavin.  Það var Valdimar Tómasson ljóðskáld. Valdi pantaði eina malt, drakk hana og spjallaði. Svo lokuðum við kl. 18,” segir í fréttatilkynningu frá Gráa Kettinum en staðurinn hefur ákveðið að bjóða afmælispönnukökupartý föstudaginn 10. nóvember í tilefni af 20 ára afmælinu.

Ekki nóg með að staðurinn sé 20 ára um þessar mundir, heldur á útidyrahurðin að staðnum 90 ára afmæli á sama tíma.

Hulda Hákon og Jón Óskar, hjón og listamenn, opnuðu Gráa köttinn við Hverfisgötu 16a fyrir tuttugu árum ásamt syni sínum Burkna. Á boðstólnum var heldur nýstárlegur matur því um morgunverðarstað var að ræða sem bauð upp á amerískar pönnukökur, egg og beikon og fleira í þeim dúr.

„Staðurinn fékk nafnið Grái kötturinn eftir orðatiltakinu - og gráa heimiliskettinum Jósteini, sem hafði löngum eytt eftirmiðdögunum uppi á ofni í vinnustofu Sigmars Ó. Maríussonar sem var áður með verslun í húsnæðinu,” segir í tilkynningunni.

Fyrr á þessu ári seldu Hulda og Jón Óskar staðinn og önnur hjón tóku við, þau Elín Ragnarsdóttir og Ásmundur Helgason. Elín og Ásmundur, sem reka einnig bókaútgáfuna Drápu, hafa ekki breytt matseðlinum né innréttingunum; bækur eru enn í hillum og listaverk á veggjum.

Pönnukökuuppskrift frá tónskáldi

Frá upphafi lögðu þau Jón og Hulda áherslu á að búa til sem flest frá grunni. Þannig er brauðið bakað á staðnum, túnfisksalat og houmous eru búin til í eldhúsinu og pönnukökudeigið er einnig blandað á staðnum. Mottóið var enski frasinn „no shortcuts“.

Upphaflegu pönnukökuuppskriftinni var skipt út fljótlega eftir opnun, og það í samvinnu við einn fastagest staðarins. „Skömmu eftir að við opnuðum Köttinn fór Leifur Þórarinsson tónskáld að venja komur sínar þangað. Hann vann á nóttunni og mætti oft snemma.  Pantaði amerískar pönnukökur og kaffi. Leifur dvaldi lengi í Bandaríkjunum og þekkti réttinn þaðan.  Eftir nokkur kynni fór hann að ámálga við okkur að pönnukökurnar væru góðar en gætu verið betri. Við spurðum hann ráða og síðan tók við tímabil þar sem Leifur mætti, fékk sínar pönnukökur með smá breytingum á uppskriftinni.  Þannig varð uppskriftin að pönnukökunum til,” er haft eftir Huldu Hákon í fréttatilkynningunni.