*

Bílar 21. desember 2019

Tvöfaldur sigur Ford

Ford er fyrsti bílaframleiðandinn sem hefur unnið bæði IVOTY og IPUA titla á sama ári tvisvar sinnum.

Róbert Róbertsson

Ford vann tvöfaldan sigur með bíla sína á International Van of the Year 2020 (IVOTY) og International Pick-up Award 2020 (IPUA) verðlaununum. Ford er þar með fyrsti bílaframleiðandinn sem hefur unnið bæði IVOTY og IPUA titla á sama ári tvisvar sinnum. Fyrra skiptið var árið 2013.

Það voru sendibílarnir Transit Custom PlugIn Hybrid og Transit Custom EcoBlue Hybrid, og svo Ford Ranger pallbíllinn sem fengu verðlaunin. Nýju Transit Custom Plug-in Hybrid og Transit Custom EcoBlue Hybrid voru sameiginlega valdir verðlaunahafar IVOTY verðlaunanna en dómnefndin var samansett af 25 sendibílablaðamönnum frá 25 Evrópulöndum. Ford hefur nú unnið IVOTY titilinn alls 6 sinnum.  Dómnefndin lagði sérstaka áherslu á fjölbreytt úrval vélaafbrigða sem eru í boði fyrir Ford fyrir Transit Custom Hybrid sendibifreiðarnar.

Tvinnvélar Ford bjóða bæði upp á bætta eldsneytiseyðslu og minni losun án þess að skerða hagkvæmni og einstaka akstursvirkni. Ford Ranger, sem hlaut IPUA verðlaunin, heillaði að mati dómnefndar með öflugri og sparneytinni 2,0 lítra EcoBlue dísilvél og háþróaðri tækniaðstoð ökumanna. Alþjóðlegu pallbílaverðlaunin IPUA eru veitt annað hvert ár en dómnefndin er samansett af 18 sérfræðingum í pallbílum. Að auki vann 2 tonna Ford Transit EcoBlue Hybrid annað sætið um IVOTY titilinn. Þannig voru þrír mismunandi Ford Transit rafmagns blendingar í fyrsta og öðru sæti International Van of the Year 2020.

Seljast vel í Evrópu 

Glænýr Ford Transit Custom Plug-in Hybrid kemur til Íslands haustið 2020. Þetta er framhjóladrifinn sendibíll sem getur keyrt allt að 56 km (NEDC) á hreinu rafmagni og er með 92,9 kW rafmótor með 13,6 kWst litíumjónarafhlöðu. Hin margverðlaunaða og sparneytna 1,0 lítra EcoBoost bensínvél frá Ford er í bílnum og hún virkar einnig sem framlenging á drægnina því hún hleður rafhlöðuna í ferð ásamt því að orkan frá hemlun er einnig nýtt til að hlaða.  

Stikkorð: Ford