*

Sport & peningar 29. október 2020

Verðlaun fyrir nýja ásýnd landsliðanna

Brandenburg hlýtur hin virtu Clio verðlaun í auglýsingagerð fyrir nýtt útlit íslensku knattspyrnulandsliðanna.

Auglýsingastofan Brandenburg hreppti hin virtu Clio verðlaun í auglýsingagerð, fyrir nýja ásýnd íslensku landsliðanna í knattspyrnu (Brand Identity), en verkefnið vann stofan fyrir Knattspyrnusamband Íslands.

Verkefni Brandenburgar fyrir KSÍ fékk verðlaun í stórum flokki íþróttatengdra verkefna (Clio Sports Winners) ásamt Nike, Budweiser, ESPN og Adidas. Þess má geta að ásýnd íslensku landsliðanna varð hlutskarpari en stórliðið Philadelphia 76ers í sínum flokki.

Hrafn Gunnarsson og Dóri Andrésson, hönnunarstjórar á Brandenburg, eru að vonum himinlifandi.

„Þetta er dálítið eins og að fá Grammy-verðlaunin í faginu. Ferlið var langt og strangt og talsverð áskorun en á sama tíma mjög gefandi og lærdómsríkt.“ segir Dóri.

„Svo erum við auðvitað afar þakklát fyrir það traust sem KSÍ hefur sýnt okkur. Dálítið eins og í fótboltanum, liðsheildin skilaði þessu alla leið,“ bætir Hrafn við.

  • Nýtt merki knattspyrnulandsliðsins verður hægt að nota á ýmsan hátt í kringum landsleiki

Stefán Sveinn Gunnarsson, markaðsstjóri KSÍ, tekur í sama streng.

„Við erum auðvitað mjög ánægð með þessa viðurkenningu. Merkið sjálft hefur fengið frábærar viðtökur, hérlendis jafnt sem erlendis, og var auðvitað toppurinn á þeim ísjaka sem heildarendurskoðun vörumerkja KSÍ er,” segir Stefán Sveinn

Clio verðlaunin sem stofnuð voru 1959 eru sögð verða með þeim virtustu í auglýsingagerð á alþjóðavísu og keppa þar stærstu auglýsingastofur hvaðanæva að fyrir heimsþekkt vörumerki. Clio verðlaunin hljóta þau verk sem dómnefnd telur eftirtektarverð, faglega leyst og líkleg til að verða öðrum hvatning í faginu.

  • Hér má sjá ýmis konar varning með nýju merki knattspyrnulandsliðsins