*

Menning & listir 5. febrúar 2018

Vetrarbræður vann níu Robert verðlaun

Myndin var valin besta myndin og Hlynur var valinn besti leikstjórinn. Myndin hlaut flest allra Robert verðlauna í ár.

Vetrarbræður  hin dansk/íslenska fyrsta kvikmynd Hlyns Pálmasonar í fullri lengd, vann níu Robert verðlaun á verðlaunaafhendingu Dönsku kvikmyndaakademíunnar í gær. Myndin var valin besta myndin og Hlynur var valinn besti leikstjórinn. Myndin hlaut flest allra Robert verðlauna í ár. 

Auk þess að vinna fyrir bestu mynd og besta leikstjóra vann myndin Robert verðlaun fyrir besta leikara í aðalhlutverki (Elliott Crosset Hove), bestu leikkonu í aukahlutverki (Victoria Carmen Sonne), bestu kvikmyndatöku (Maria von Hausswolff), bestu leikmynd (Gustav Pontoppidan), bestu búninga (Nina Grønlund), bestu förðun (Katrine Tersgov) og bestu hljóðhönnun (Lars Halvorsen).

Nýlega hlaut Vetrarbræður þrjár tilnefningar til Bodil verðlaunanna, verðlaunaafhendingu Danskra kvikmyndagagnrýnenda, þar á meðal fyrir bestu mynd og besta leikara í aðalhlutverki. Bodil verðlaunin munu fara fram 17. mars næstkomandi.

Myndin hefur fengið frábærar viðtökur danskra gagnrýnenda og var m.a. valin besta mynd ársins hjá kvikmyndatímaritinu Ekko og var í öðru sæti yfir bestu myndir ársins hjá Politiken dagblaðinu.

Vetrarbræður hefur unnið til 13 alþjóðlegra verðlauna síðan hún var heimsfrumsýnd á hinni virtu Locarno kvikmyndahátíð í Sviss í ágúst síðastliðnum, þar sem fjögur verðlaunanna unnust.

Næst á dagskrá hjá Hlyni er áframhaldandi þróun sinnar næstu kvikmyndar, Hvítur, hvítur dagur, sem áætlað er að fari í tökur í ágúst á þessu ári. Hvítur, hvítur dagur vann nýverið til ARTE verðlaunanna á CineMart, samframleiðslumarkaði hinnar  virtu Rotterdam kvikmyndahátíðar.

25 ára afmælistilboð VB – 50% afsláttur af áskrift

Afmælistilboð VB

Viðskiptablaðið er 25 ára og af því tilefni býðst nýjum áskrifendum að kaupa áskrift á 50% afslætti.
Afmælisverðið er aðeins 2.500 krónur.

Tilboðið er fyrir nýja áskrifendur. Núverandi áskrifendur geta bætt við sig áskrift á þessu verði. Gildir í 4 mánuði. Áskrifendur fá Viðskiptablaðið, Frjálsa verslun og Fiskifréttir sent ásamt vefaðgangi að vb.is og fiskifrettir.is