*

Bílar 23. desember 2021

Vivaldi vafri í Pólstjörnuna

Vivaldi er fyrsti vafrinn sem er fáanlegur fyrir Android Automotive OS.

Róbert Róbertsson

Polestar hefur nú innleitt Vivaldi vafra í rafbílinn Polestar 2. Sem svar við óskum Polestar eigenda, þá er bíllinn nú búinn fullkomnum vafra sem gerir notendum kleift að vafra um vefinn eins og þeir myndu gera í öðrum snjalltækjum. Þetta er fyrsti vafrinn sem er fáanlegur fyrir Android Automotive OS. 

„Það er frábært að hafa getað svarað óskum eigendasamfélagsins okkar um vafra með Vivaldi sem jólagjöf. Nýr heimur opnast með aðgengi að efni alnetsins í Polestar 2 – jafnvel aðgengi að sumum af uppáhalds streymisveitunum þínum,“ segir Thomas Ingenlath, forstjóri Polestar.

Smáforritið, sem er þróað fyrir Polestar 2 af Vivaldi teyminu í Noregi, býður upp á víðtæka vafravirkni á 11 tommu miðjuskjánum í bílnum með Android Automotive OS og virkar á svipaðan hátt og það myndi gera í snjalltæki - með flipavafri, streymisvirkni, netverslun og hámarks öryggi.

Fyrirtækið Vivaldi Technologies, stofnað af Seltirningnum Jóni S. von Tetzchner, er á bak við Vivaldi vafrann sem var settur í loftið í apríl 2016. Höfuðstöðvar fyrirtækisins eru í Ósló í Noregi en þróun vafrans fer líka fram á skrifstofum fyrirtækisins í Reykjavík, Boston og Palo Alto.

Vivaldi vafrinn fyrir Polestar 2 er nú fáanlegur á öllum mörkuðum í Evrópu, Norður Ameríku og ákveðnum Asíu mörkuðum við Kyrrahaf. Í kjölfar nýlegrar hugbúnaðaruppfærslu fyrir Polestar 2 í lok nóvember eru tæknilegir eiginleikar Polestar nú einnig byggðir fyrir afþreyingu.

Þetta styður enn frekar við stöðu Polestar vegna fyrirhugaðrar sameiningar fyrirtækisins við Gores Guggenheim, sem gert er ráð fyrir að verði lokið á fyrri hluta árs 2022.

Stikkorð: Vivaldi  • Polestar 2