Björn Björnsson hefur verið ráðinn framkvæmdastjóri upplýsingatæknisviðs Arion banka og mun hefja störf þann 6. mars næstkomandi. Björn tekur við starfinu af Styrmi Sigurjónssyni sem hefur gengt stöðunni frá árinu 2020 en hann óskaði í lok síðasta árs eftir að láta af störfum hjá bankanum.
Björn kemur til Arion frá Boston Consulting Group (BCG) þar sem hann hefur m.a. starfað með mörgum af stærstu fjármálafyrirtækjum Ástralíu og Norðurlanda að stefnumarkandi verkefnum í upplýsingatækni.
Áður en Björn hóf störf hjá BCG vann hann sem stjórnandi og sérfræðingur hjá íslenskum fjármálafyrirtækjum, m.a. sem framkvæmdastjóri áhættustýringar hjá Byr.
Björn er með BS próf í tölvunarfræði og MS próf í iðnaðarverkfræði frá Háskóla Íslands og MBA próf frá Melbourne Business School. Hann er giftur Hrefnu Þorbjörgu Hákonardóttur sjúkraþjálfara og eiga þau tvö börn.
