Magnús Sigurbjörnsson hefur verið ráðinn nýr forstöðumaður Rannsóknarsetur verslunarinnar. Þetta kemur fram í tilkynningu frá RSV.
Starfsemi rannsóknarsetursins felst í að fylgjast með þróun og breytingum er varða verslun og neysluhegðun. RSV er leiðandi aðili á Íslandi í rannsóknum og tölfræðivinnslu fyrir verslun og tengdar atvinnugreinar.
Magnús lauk MBA prófi frá Háskólanum í Reykjavík árið 2021 og B.Sc. gráðu í tölvunarfræði frá sama skóla árið 2011. Hann hefur starfað sem stafrænn ráðgjafi síðustu ár með áherslu á vefþróun, vefverslanir og stafræna markaðssetningu. Þá var hann framkvæmdastjóri borgarstjórnarhóps Sjálfstæðisflokksins á árunum 2013-2017.
„Ég hlakka mikið til að stækka og efla RSV á næstu mánuðum. Við búum yfir gríðarlega mikið af upplýsingum um hvernig við sem neytandi högum okkur en þessar upplýsingar eiga bæði erindi við stjórnendur fyrirtækja og almenning,” er haft eftir Magnúsi í tilkynningunni.
„Við erum mjög spennt að fá Magnús til liðs við okkur til að leiða RSV. Rannsóknarsetrið hefur verið í mikilli stefnumótunarvinnu síðustu tvö ár og á haustmánuðum kynnti það nýja vöru, notendavefinn Sarpinn, en hann inniheldur allar helstu tölfræðiupplýsingar, kortaveltugögn, vísitölur, rannsóknir og greiningar er varða verslun og þjónustu í landinu. Þetta var stórt skref hjá RSV og hefur Magnús þá styrkleika sem við teljum að setrið þurfi á þessum tímapunkti til að halda áfram þessari spennandi vegferð sem setrið er á,” segir María Jóna Magnúsdóttir formaður stjórnar.