Þann 1. júní síðastliðinn var Þórdís Bjarnadóttir lögmaður tekin inn í eigendahóp Deloitte Legal, sem nú samanstendur af 4 eigendum þvert á þjónustulínur lögmannsstofunnar. Þetta kemur fram í tilkynningu.

Þórdís hóf störf hjá Deloitte árið 2018 og því næst hjá Deloitte Legal í október í fyrra þegar stofan tók til starfa. Þar áður starfaði Þórdís hjá Advel lögmönnum og hjá Viðskiptaráði Íslands. Þá sat Þórdís jafnframt í stjórn Varðar líftryggingar árin 2016-2018. Samhliða störfum sínum hefur Þórdís einnig sinnt stundarkennslu við Háskólann í Reykjavík, þaðan sem hún útskrifaðist sjálf árið 2007.

Í störfum sínum sem lögmaður hefur Þórdís sérhæft sig í ráðgjöf til fyrirtækja, samrunum, yfirtökum og fjármögnun þeirra. Þar undir eru fyrirtæki í öllum helstu atvinnugreinum en að auki hefur Þórdís umtalsverða reynslu af ráðgjöf og þjónustu til skráðra fyrirtækja og annarra eftirlitsskyldra aðila. Þórdís fékk réttindi til málflutnings fyrir héraðsdómstólum árið 2013 og hefur auk þess lokið prófi í verðbréfamarkaðsrétti og leyfi sem fasteigna- og skipasali.

Haraldur I. Birgisson, meðeigandi og framkvæmdastjóri Deloitte Legal:

„Það er virkilega ánægjulegt að fá Þórdísi í eigendahóp Deloitte Legal. Við erum ung en vaxandi lögmannsstofa sem einblínir á þá kjarnaþætti lögfræðinnar sem snúa að rekstri, stefnu og umbreytingu fyrirtækja. Þórdís mun leið ráðgjöf okkar vegna kaupa og sölu fyrirtækja og mun reynsla hennar af samrunum, yfirtökum og fjármögnun stórra sem smárra fyrirtækja í margvíslegum atvinnugreinum efla sókn okkar á því sviði.“