N1 og Þorgrímur Þráinsson hafa undirritað samning um áframhaldandi samstarf fyrirtækisins og fyrirlesarans. Þetta kemur fram í fréttatilkynningu frá N1.
„Þorgrímur hefur undanfarin ár flutt fyrirlesturinn Verum ástfangin af lífinu, í boði N1, fyrir alla 10. bekki á Íslandi, skólunum að kostnaðarlausu. Skólarnir eru vel á annað hundrað og fjöldi nemenda hleypur á þúsundum. Fyrirlestrar Þorgríms hafa verið vel sóttir en undanfarin 5 ár hafa 99% skóla þegið boð Þorgríms um fyrirlestur,“ segir í tilkynningu.
Fyrirlestur Þorgríms, sem er liðlega 80 mínútur að lengd, samanstendur af um 60 glærum og myndböndum. Í tilkynningu segir að um hvatningarfyrirlestur sé að ræða þar sem fjallað er um markmiðasetningu, samkennd, vináttu, traust, kærleika, liðsheild og mikilvægi þess að nemendur beri ábyrgð á sjálfum sér og sýni öllum virðingu. Þ
Þorgrímur gaf út bókina Verum ástfangin af lífinu í nóvember 2021 en hún hefur að geyma það sem Þorgrímur hefur borið á borð fyrir nemendur í rúman áratug, í boði N1.
Nýundirritaður samningur Þorgríms og N1 gildir fyrir til loka skólaársins 2023-2024. Stuðningur N1 er í samræmi við stefnu félagsins um samfélagslega ábyrgð og stuðning við yngri kynslóðir landsins, ekki síst í íþrótta- og æskulýðsstarfi.
„Það eru forréttindi fyrir mig að fá að blása ungu fólki anda í brjóst á hverjum degi og stuðningur N1, og annarra fyrirtækja, ómetanlegur á þeirri vegferð. Samfélagsleg ábyrgð skiptir máli og við eigum öll að hjálpast að við að styðja unga fólkið. Skólasamfélagið kann vel að meta boðskapinn í Verum ástfangin af lífinu ég mun halda mínu striki á meðan ástríðan er til staðar,“ segir Þorgrímur Þráinsson í fréttatilkynningu.
Þyrí Dröfn Konráðsdóttir, forstöðukona markaðssviðs N1, segir í tilkynningu að samstarf N1 og Þorgríms hafi gengið vel á undanförnum árum en N1 hefur styrkt verkefnið frá árinu 2015. Brim og Bláa lónið styrkja verkefnið sömuleiðis.
„Fyrirlestur Þorgríms hefur slegið í gegn og það er ánægjulegt að hann muni áfram fá að heyrast í grunnskólum landsins. Við hjá N1 teljum mikilvægt að hlúa vel að unga fólkinu okkar og senda það með gott veganesti út í lífið. Stuðningur við Verum ástfangin af lífinu samræmist þeirra sýn okkar fullkomlega.“
