Vöruviðskiptahalli Íslands var 100,8 milljarðar króna á fyrstu ellefu mánuðum ársins 2019, en fluttar voru út vörur fyrir 598,4 milljarða en inn fyrir 699,2 milljarða að því er Hagstofa Íslands greinir frá.
Á sama tíma ári fyrr voru vöruviðskiptin óhagstæð um 166,3 milljarða króna, miðað við gengi hvers árs, og var hann því 65,5 milljörðum króna hagstæðari á síðasta ári en árið 2018. Ef ekki er tekið tillit til viðskipta með skip og flugvélar nam vöruviðskiptahallinn 107,4 milljörðum króna á tímabilinu janúar til nóvember 2019, en 151,3 milljörðum króna fyrir sama tímabil 2018.
Í nóvembermánuði voru vöruviðskiptin óhagstæð um 4,4 milljarða, en þá voru fluttar út vörur fyrir 52,1 milljarð og inn fyrir 56,5 milljarða króna. Í nóvember 2018 voru vöruviðskiptin óhagstæð um 18,8 milljarða króna á gengi hvors árs fyrir sig.1 Vöruviðskiptahallinn í nóvember 2019 var því 14,4 milljörðum króna minni en á sama tíma fyrir ári. Án skipa og flugvéla nam vöruviðskiptahallinn í mánuðinum 1,7 milljörðum króna, samanborið við 18,3 milljarða króna halla í nóvember 2018.
Vöruútflutningur jókst um 9%, en innflutningur um 2,3%
Á fyrstu ellefu mánuðum ársins 2019 var verðmæti vöruútflutnings 49,4 milljörðum króna meira en á sama tímabili árið áður, eða 9,0% á gengi hvors árs fyrir sig. Iðnaðarvörur voru 47,6% alls útflutnings og var verðmæti þeirra 2,8% minni en á sama tíma árið áður. Sjávarafurðir voru 40,7% alls vöruútflutnings og var verðmæti þeirra 11,3% meiri en á sama tíma árið áður. Mest var aukning vegna sjávarafurða, aðallega á ferskum fiski og frystum flökum. Á móti kom minna verðmæti álútflutnings á milli ára.
Á sama tíma var var verðmæti vöruinnflutnings 16,1 milljarði króna minni en á sama tímabili árið áður, eða 2,3% á gengi hvors árs fyrir sig. Innflutningur dróst mest saman á eldsneyti og flutningatækjum. Á móti kom aukinn innflutningur á fjárfestingarvörum annars vegar og mat- og drykkjarvörum hins vegar.
