Bókfærður einskiptikostnaður nam 11,4 milljónum króna vegna starfsloka í nýbirtum árshlutareikningi Ríkisútvarpsins ohf. Í samtali við Viðskiptablaðið segir Páll Magnússon útvarpsstjóri að stærsta skýringin sé vegna starfsloka Sigrúnar Stefánsdóttur, fyrrverandi dagskrárstjóra RÚV.
„Ábyggilega er stærsta skýringin þarna. Það er örugglega eitt hvað fleira sem kemur til þó ég muni það ekki alveg í svipinn og starfslok hennar vegi einna þyngst,“ segir Páll sem var staddur úti á landi þegar Viðskiptablaðið náði tali af honum.
Sigrún Stefánsdóttir lét af störfum sem dagskrárstjóri í byrjun október á síðasta ári. Þegar tilkynnt var um uppsögnina var greint frá því að Sigrún hætti samstundis störfum.
Nánar er fjallað um málið í Viðskiptablaðinu. Áskrifendur geta nálgast blaðið undir liðnum tölublöð hér að ofan.