Hagnaður SPH árið 2005 af rekstri sjóðsins nam 848 milljónum króna fyrir skatta samanborið við 390 milljónir króna árið 2004, en það er aukning um 117,4% frá árinu 2004. Í tilkynningu félagsins kemur fram að þegar tekið hefur verið tillit til skatta var hagnaðurinn 704 milljónir króna, sem er aukning um 120,4% miðað við árið 2004.

Ársreikningurinn er gerður eftir sömu reikningsskilaaðferðum og síðasta ár.

Vaxtatekjur námu 3.929 milljónum króna, jukust um 36,5% milli ára, en vaxtagjöld námu 2.571 milljón króna, sem er 52,6% aukning. Hreinar vaxtatekjur námu því 1.358 milljónum króna, en voru 1.195 milljónir króna á árinu 2004, og var aukningin því 13,7% á milli ára. Vaxtamunur, þ.e. hreinar vaxtatekjur sem hlutfall af heildarfjármagni, er nú 3,2 af heildarfjármagni í samanburði við 3,1% árið áður.

Markaðsviðskipti sparisjóðsins gengu vel, enda markaðir hagstæðir á tímabilinu. Gengishagnaður af innlendum og erlendum veltuverðbréfum nam 579 milljónum króna, samanborið við 576 milljónir króna á árinu 2004. Alls námu aðrar tekjur sparisjóðsins 1.273 milljónum króna, samanborið við 1.154 milljónir króna árið 2004 sem er aukning um 10,4%.

Rekstrargjöld námu 1.623 milljónum króna samanborið við 1.397,1 milljón króna á árinu 2004, sem er 16,2% aukning á milli ára. Hlutfall rekstrarkostnaðar af tekjum á tímabilinu var 61,7% og hækkaði úr 58,8% frá síðasta ári. Laun og launatengd gjöld námu 909 milljónum króna en voru 700 milljónir króna á árinu 2004, jukust þau um 29,8% milli ára. Annar rekstrarkostnaður nam 592 milljónum króna en var 612 milljónir króna á árinu 2004, lækkaði um 3,3 á milli ára.

Framlag í afskriftareikning útlána nam 160 milljónum króna, en á árinu 2004 nam framlagið 561 milljón króna. Afskriftareikningur útlána nam 486 milljónum króna í árslok 2005 sem svarar til 1,6% af útlánum og veittum ábyrgðum, en hlutfallið í árslok 2004 var 2,0%. Framlag í afskriftareikning útlána endurspeglar þó ekki endilega töpuð útlán, heldur er um að ræða fjárhæð sem lögð er til hliðar til að mæta hugsanlegum útlánatöpum.