*

miðvikudagur, 28. júlí 2021
Innlent 12. nóvember 2011 13:44

200 umsagnir um verndun og nýtingu náttúrusvæða

Með rammaáætlun er mörkuð stefna um hvaða virkjunarkostir koma til greina og hvaða svæði ber að friða.

Ritstjórn
Aðsend mynd

Síðustu 12 vikurnar hefur staðið yfir opið samráðs- og kynningarferli um drög að þingsályktun iðnaðarráðherra og umhverfisráðherra um verndun og nýtingu náttúrusvæða með áherslu á vatnsafl og jarðhitasvæði. Umsagnarferlinu lauk á miðnætti og bárust um 200 umsagnir, endanlegur fjöldi liggur ekki alveg strax fyrir þar sem enn geta verið umsagnir á leið í pósti.

Með rammaáætlun er mörkuð stefna um það hvaða virkjunarkostir komi til greina og hvaða svæði beri að friða og er markmiðið að ná framtíðarsýn í verndunar- og virkjanamálum og almennri sátt í þjóðfélaginu. Þingsályktunardrögin sem voru til umsagnar byggja á viðamikilli vinnu verkefnisstjórnar 2. áfanga rammaáætlunar og faghópa hennar.

Nú munu umhverfisráðherra og iðnaðarráðherra fara yfir umsagnirnar og leggja í framhaldinu sameiginlega fram þingsályktunartillögu fyrir Alþingi sem hefur síðasta orðið um það hvernig þeim svæðum sem komu til mats verður raðað í nýtingarflokk, biðflokk eða verndarflokk. Sjá má allar umsagnirnar sem bárust á vefnum rammaaaetlun.is

Stikkorð: Virkjanir Orka