Kostnaður við aðgerðarpakka stjórnvalda til að bregðast við efnahagsafleiðingum af útbreiðslu kórónuveirunnar er metinn á um 230 milljarða króna. Alls eiga aðgerðirnar að nema um 7,8% af landsframleiðslu.
Alls voru tíu aðgerðir kynntar á blaðamannafundi í dag :
- Greiða á bætur til þeirra sem verða tímabundið fyrir skertu starfshlutfalli. Það á að kosta ríkissjóð um 22 milljarða króna en tryggja störf þúsunda Íslendinga.
- Brúarlán til atvinnulífs. Ríkið mun veita ábyrgð helming nýrra brúarlána til fyrirtækja sem eiga í rekstrarvanda vegna faraldursins upp á að hámarki 35 milljarða króna. Viðskiptabankar eiga því að hámarki að geta lánað 70 milljarða króna vegna þessa. Lækka á bankaskatt fyrir þetta ár sem nema á um 11 milljörðum króna sem á að gera bönkunum mögulegt að styðja betur við atvinnulífið.
- Fyrirtæki sem sjá fram á þriðjungs samdrátt tekna milli ára fá að fresta skattgreiðslum fram til ársins 2021 og dreifa þeim yfir 9 mánuði á næsta ári. Þá mun fyrirframgreiðsla tekjuskatts frestast fram að álagningu í október. Þetta á að styrkja lausafjárstöðu íslenskra fyrirtækja um 75 milljarða króna.
- Ríkissjóður endurgreiðir laun einstaklinga í sóttkví.
- Greiddur verður út sérstakur barnabótaauki 1. júní 2020 með öllum börnum undir 18 ára aldri. Foreldrar með lægri meðaltekjur en 927 þúsund krónur á mánuði árið 2019 fá 40 þúsund krónur á hvert barn og aðrir fá 20 þúsund krónur með hverju barni.
- Heimild til úttektar séreignarsparnaðar.
- Aðgerðir til að styrkja ferðaþjónustuna. Allir íbúar á Íslandi fá stafrænt gjafabréf til að ferðast innanlands. Gistináttagjald verður fellt niður til ársloka 2021 og leggjast á í alþjóðlegt markaðsátak upp á 1,5 milljarða króna þegar ferðaþjónusta í heiminum tekur við sér á ný.
- Endurgreiðsla virðisaukaskatts til einstaklinga vegna vinnu við endurbætur, viðhald og nýbyggingar fasteigna hækkar úr 60% í 100%. Endurgreiðslan á einnig að ná til heimilisaðstoðar auk byggingaframkvæmda félagasamtaka til almannaheilla.
- Tollafgreiðslugjöld verða felld niður tímabundið til ársloka 2021. Gjalddögum aðflutningsgjalda árið 2020 er frestað um fjóra mánuði.
- Stjórnvöld munu flýta fjárfestingum. Viðbótarfjárfestingar upp á 20 milljarða króna eru ráðgerðar á þessu ári.
Hér má sjá kostnaðarmat stjórnvalda á aðgerðunum:
