Hinn 12. mars árið 1989 skrifaði Tim Berners-Lee tillögu að upplýsingakerfi, sem átti eftir að verða vefurinn (World Wide Web), en fullyrða má að engin uppfinning önnur hafi átt jafnmikinn þátt í að gera netið að almenningseign.
Berners-Lee fékk grænt ljós á hugmyndina frá yfirmönnum sínum hjá cern, Evrópsku kjarnorkurannsóknarstofnuninni í Genf, og fljótlega litu fyrstu útgáfur vefjarins ljós, fyrst til innanhúsnotkunar, en skjótt víðar. Mestu munaði þó sjálfsagt um að Berners-Lee galopnaði á kóðann og gaf heimsbyggðinni vefinn. Fyrir vikið hefur vefurinn ekki verið háður duttlungum ríkisstofnana eða einkaleyfum fyrirtækja. Það hefur reynst honum og notendum hans verulegur styrkur, því það hefur ekki skort áhugann á því hjá hinum og þessum að sölsa vefinn undirsig.
„Ég varði miklum tíma í að búa svo um hnútana að fólk gæti sett hvers konar efni á vefinn,“ segir Berners- Lee um upphaf vefjarins og helstu markmiðin í upphaflegri forritun hans. „En ég hafði ljóslega enga hugmynd um að fólk myndi setja bókstaflega hvað sem er á vefinn!“
Nánar er fjallað um málið í Viðskiptablaðinu. Áskrifendur geta nálgast blaðið hér að ofan undir liðnum tölublöð .
