Arion banki gaf í dag út skuldabréf til fimm ára að upphæð 300 milljónir evra eða sem nemur um 36 milljörðum íslenskra króna. Í heild bárust tilboð frá yfir 50 fjárfestum fyrir rúmlega 400 milljónir evra. Þetta kemur fram í fréttatilkynningu frá Arion banka.

Skuldabréfin sem að bankinn gaf út bera fasta 1,625% vexti og voru seld á kjörum sem jafngilda 1,65% álagi á millivexti. Barclays, Citi, Deutsche Bank og Morgan Stanley sem sáu um útgáfuna fyrir hönd bankans.

„Um er að ræða þriðju útgáfu Arion banka í evrum og er hún seld til breiðs hóps fjárfesta en til stendur að nýta hluta lánsins til að greiða niður eldri lán.

Skuldabréfaútgáfan nú kemur í framhaldi af vinnu undanfarinna ára við að auka fjölbreytni í fjármögnun bankans og nýlegri hækkun á lánshæfismati. Arion banki er með lánshæfiseinkunnina BBB, með jákvæðum horfum, frá Standard & Poor´s,“ segir í tilkynningu bankans.

Haft er eftir Höskuldi H. Ólafssyni, bankastjóra Arion banka, að hægt sé að sjá kjör Arion banka á alþjóðlegum lánsfjármörkuðum batna stöðugt. „Það skiptir okkur og viðskiptavini okkar miklu. Bætt kjör endurspegla aukið traust til bankans og efla samkeppnisstöðu okkar,“ er segir Höskuldur í tilkynningunni.