*

föstudagur, 20. september 2019
Innlent 31. ágúst 2019 14:05

40% samdráttur á bílamarkaði

Nýskráningar fólksbíla og nýjar lánveitingar til íslenskra heimila vegna bílakaupa hafa dregist töluvert saman það sem af er ári.

Ástgeir Ólafsson
vb.is

Nýskráningar nýrra fólksbifreiða hafa dregist töluvert saman það sem af er þessu ári. Frá áramótum og til loka júlímánaðar hafði 9.481 bíll verið nýskráður en á sama tímabili í fyrra voru þeir 15.717 samkvæmt gögnum frá Samgöngustofu. Hafa nýskráningar nýrra fólksbíla því dregist saman um tæplega 40% á fyrstu sjö mánuðum ársins frá sama tímabili í fyrra. Þess ber að geta að um er að ræða nýskráningar allra fólksbíla og því eru kaup fyrirtækja eins og bílaleiga einnig inni í tölunum.

Nýskráningar nýrra fólksbíla á síðustu 12 mánuðum voru 14.979 sem er 35% lækkun frá sama tímabili fyrir ári síðan. Nýskráningar hafa dregist nær samfellt saman frá janúar 2018 þegar þær náðu 12 mánaða sögulegu hámarki sínu upp á 26.138 bíla en hafa síðan þá lækkað í hverjum mánuði miðað við sama mánuð árið á undan. Nýskráningar síðustu 12 mánaða eru nú á svipuðum stað og þær voru í nóvember árið 2015. Til samanburðar má nefna að 15.944 fólksbílar voru nýskráðir árið 2007 og 17.127 árið 2006. Nýskráningar á tólf mánaða tímabili höfðu þá hækkað um tæplega 150% frá árinu 2014 og vaxið samfellt frá árunum 2009 og 2010 þegar 2.211 og 3.095 fólksbílar voru nýskráðir.

31% samdráttur í bílalánum  

Á sama tíma og nýskráningar hafa dregist saman hafa ný bílalán íslenskra heimila að frádregnum uppgreiðslum dregist saman um 31% á fyrstu sjö mánuðum ársins miðað við sama tímabil í fyrra. Samtals námu nýjar lánveitingar til bílakaupa tæpum 6 milljörðum króna á fyrrgreindu tímabili en voru rúmlega 8,7 milljarðar á sama tímabili í fyrra samkvæmt gögnum frá Seðlabanka Íslands.

Nýjar lánveitingar til bílakaupa á síðustu 12 mánuðum námu um 10,3 milljörðum króna í júlí en námu 14,1 milljarði á sama tíma í fyrra og hafa því dregist saman um 24% milli ára. Þess ber þó að geta að íslensk heimili höfðu ekki tekið jafn háa upphæð að láni til bílakaupa í einum mánuði frá hruni eins og í júlí í fyrra þegar lánveitingar námu 1,8 milljörðum auk þess sem júní árið 2018 var sá næststærsti frá hruni. Ný bílalán yfir 12 mánaða tímabil höfðu þá vaxið um tæp 50% frá því í mars 2016 en eru nú á svipuðum stað og í júlí sama ár.

Nánar má lesa um málið í Viðskiptablaðinu. Áskrifendur geta nálgast blaðið undir Tölublöð, aðrir geta gerst áskrifendur hér.

Stikkorð: Bílar Nýskráningar