Árvakur hf. sem er útgefandi Morgunblaðsins, mbl.is og K100, tapaði 415 milljónum króna árið 2018. Afkoma fyrir afskriftir, fjármagnsliði og skatta (EBITDA) var neikvæð um 238 milljónir króna. Tekjur félagsins jukust um 110 milljónir króna og námu 3,8 milljörðum króna. Gjöld jukust meira og þar vegur launakostnaður langþyngst, að því er kemur fram á vef mbl.is .
Eignir Árvakurs voru rúmir tveir milljarðar króna um síðustu áramót, og eiginfjárhlutfall var rúmlega 28%. Í frétt mbl.is segir jafnframt að ákveðið hafi verið að ráðast í hlutafjáraukningu til að treysta fjárhagsstöðu félagsins og unnið sé við að ljúka henni um þessar mundir.
„Ráðist hefur verið í umfangsmiklar aðgerðir til að hagræða í rekstri félagsins og eru þær farnar að skila umtalsverðum árangri á síðustu mánuðum. Engu að síður er rekstrarumhverfið enn erfitt, eins og ítrekað hefur komið fram í opinberri umræðu. Samkeppnin við Ríkisútvarpið hefur orðið sífellt erfiðari, en neikvæð umræða á vinnumarkaði, sem enn heldur áfram þó að stærstu aðilar á vinnumarkaðnum hafi samið, hefur auk stórra áfalla í atvinnulífinu haft verulega neikvæð áhrif á auglýsingamarkaði og þar með á rekstur fjölmiðla,“ er haft eftir Haraldi Johannessen, framkvæmdastjóra Árvakurs, í frétt mbl.is.
„Erfitt rekstrarumhverfi breytir því þó ekki að miðlar Árvakurs standa mjög sterkt um þessar mundir og ná augum og eyrum meira en níu af hverjum tíu landsmönnum, sem gerir Árvakur að öflugasta fjölmiðlafyrirtæki landsins. Og Árvakur hefur þrátt fyrir rekstrarumhverfið haldið áfram að ráðast í breytingar og nýjungar til að bæta þjónustu við notendur miðlanna, nú síðast með miklum breytingum á mbl.is eins og landsmenn sáu fyrir réttri viku," segir Haraldur jafnframt í fréttinni.