Það sem af er ári hefur sala á áfengi aukist um 3,13% og um 2,86% á neftóbaki frá fyrra ári, en á sama tíma hefur sala á sígarettum dregist saman um 1,65% að því er Morgunblaðið greinir frá uppúr tölum frá ÁTVR. Vindlasala hefur dregist saman um 3,32%.
Samtals er salan á neftóbakinu á árinu tæplega 43 þúsund kíló. Sala á freyðivíni og kampavíni hefur numið um 205 þúsund lítrum en söluaukningin á því hefur numið tæplega 32%. Söluaukningin á blönduðum drykkjum hefur numið 29%, og svo hefur salan á öðrum bjórtegundum vaxið um 12,3%.
Salan á jólabjórnum svokallaða sem kom í búðir fyrir fjórum vikum hefur aukist um 3,75% frá sama tíma fyrir ári, en Tuborg er vinsælastur með 48% markaðshlutldeild, en næstur er Viking með 10%, Jólagull með 6,7%, Thule með 6,3% og Jóla Kaldi með tæp 4%.
Sala á hvítvíni hefur aukist um 6,7%, rósavínsalan hefur aukist um 9,9% allt á sama tíma og salan á rauðvíni stendur í stað. Sala á viskí og tekíla eykst um ríflega 7%.
