Fagfjárfestar sóttust eftir 57% fleiri hlutum í Teymi hf. en stóðu til boða, í nýloknu hlutafjárútboði félagsins að því er segir í fréttatilkynningu félagsins. Hlutafé Teymis var aukið um 4 milljarða króna að söluvirði í útboðinu sem lauk á föstudag.
Núverandi hluthöfum Teymis stóð til boða að kaupa helming af auknu hlutafé og var umframeftirspurn þar einnig veruleg. Útboðsgengið var 4,75 krónur fyrir hvern hlut.
Í frétt félagsins kemur fram að stjórn Teymis sóttist eftir því að fjölga lífeyrissjóðum og öðrum fagfjárfestum í hluthafahópi Teymis og var útboðinu tvískipt, annarsvegar til núverandi hluthafa og hinsvegar til fagfjárfesta. Í útboði til fagfjárfesta voru í boði hlutir að söluvirði 2 milljarðar króna og óskuðu fagfjárfestar eftir að kaupa um 3,9 milljarða. Í útboðinu til hluthafa voru sömuleiðis 2 milljarðar króna í boði og óskuðu núverandi hluthafar eftir að kaupa hluti fyrir um 2,4 milljarða.
Árni Pétur Jónsson, forstjóri Teymis hf. segir í tilkynningunni: ?Fagfjárfestar hafa sýnt með þessari þátttöku í útboðinu að þeir hafa trú á rekstri Teymis og á tækifærum félagsins á fjarskipta og upplýsingatæknimarkaði. Þetta er viðurkenning á því að okkur hefur tekist það ætlunarverk okkar að öðlast tiltrú markaðarins með markvissri stefnu, skipulögðum aðgerðum og skýrum skilaboðum.?
Þórdís J. Sigurðardóttir, stjórnarformaður Teymis hf.: ?Við fögnum góðri þátttöku fagfjárfesta í útboðinu og lýsum sérstakri ánægju með að stærstu lífeyrissjóðir landsins bætist í hluthafahóp Teymis.?
Stefnt er að skráningu nýrra hluta í Kauphöll Íslands 3. apríl næstkomandi en gjalddagi útboðsins er miðvikudagurinn 28. mars 2007. Fyrirtækjaráðgjöf Landsbankans hafði umsjón með hlutafjárútboðinu.
Teymi hf. er eignarhaldsfélag í fjarskiptum og upplýsingatækni. Dótturfélög þess eru Vodafone, Kall í Færeyjum, SKO/Btnet og þjónustufyrirtækið Mamma í fjarskipta-hlutanum og Kögun, Skýrr og EJS í upplýsingatæknihlutanum. Teymi á auk þess tæpan helming í félaginu Hands Holding þar sem meðal annars eru Opin kerfi Group, Landsteinar-Strengur og Hugur/Ax,
