Stjórn Valitor, dótturfélags Arion banka hefur ákveðið að ráðast í endurskipulagningu á félaginu til að styrkja kjarnastarfsemi þess og snúa við taprekstri. Samkvæmt tilkynningu sem Arion sendi til Kauphallarinnar er kostnaður við breytingarnar áætlaður 600 milljónir króna og mun verða bókfærður í uppgjöri samstæðunnar fyrir fjórða ársfjórðung 2019.
Er þetta í annað sinn á árinu sem Arion banki sendir frá sér afkomuviðvörun vegna Valitor sem skilgreint er sem eign til sölu í bókum bankans og verður áfram í virku söluferli sem hefur staðið yfir frá því snemma á þessu ári. Í október færði bankinn eign sína í félaginu niður um 900 milljónir vegna aukins tap í starfsemi félagsins. Hefur Arion því bókfært 1,5 milljarða kostnað vegna Valitor á árinu sem nú er að líða
Sjá einnig: USi, Valitor og TravelCo bíta fast
Í tilkynningunni segir að gert sé ráð fyrir að áðurnefndar aðgerðir Valitor muni breyta afkomu félagsins úr tapi yfir í rekstrarhagnað fyrir afskriftir og fjármagnsliði (EBITDA en að nánar verði greint frá inntaki fyrirhugaðra breytinga innan tveggja vikna.
Þá segir einnig að fjárfestingar Valitor í alþjóðlegri starfsemi hafi verið umtalsverðar á undanförnum árum. Þessar fjárfestingar hafi skilað tekjuvexti en en sala á alrásarlausnum (e. omni-channel solutions), vörulínu fyrir evrópsk stórfyrirtæki, hafi ekki staðið undir væntingum. Þar muni mest um mest um 6 milljarða króna fjárfestingu í alrásarlausnum á tímabilinu frá árinu 2014, en bókfærð óefnisleg eign af þessum fjárfestingum nemur nú um 4,5 milljörðum króna.
Hins vegar nema ætlaðar tekjur af lausninni eingöngu um 1,1 milljarði króna árið 2019. Áætlað er að draga verulega úr áframhaldandi fjárfestingum á þessu sviði.
Að lokum segir að með framangreindum skipulagsbreytingum muni draga verulega úr fjárfestingaþörf og rekstrarkostnaði sem mun hafa jákvæð áhrif á afkomu félagsins og þar með Arion banka.
