*

sunnudagur, 25. október 2020
Innlent 23. september 2020 14:22

755 milljónir í lán til nýsköpunar

26 af 31 fyrirtæki í nýsköpun sem sóttu um fá sérstök mótframlagslán Stuðnings-Kríu. Koma á móti fjármögnun einkaaðila.

Ritstjórn
Þórdís Kolbrún Reykfjörð Gylfadóttir er ráðherra iðnaðar-, ferðamála- og nýsköpunar í atvinnuvega- og nýsköpunarráðuneytinu.
Haraldur Guðjónsson

Af 31 fyrirtæki sem sóttu um lán frá tímabundnu stuðningsúrræði stjórnvalda við nýsköpunarfyrirtæki voru 26 umsóknir samþykkt, en umsóknarfrestur um veitingu lána rann út um nýliðna helgi. Skilyrði þátttöku Stuðnings-Kríu er að umsækjandi hafi tryggt sér sambærilega fjármögnun einkafjárfesta í formi hlutafjár eða lánveitingar.

Eins og Viðskiptablaðið hefur fjallað um er grunnhugmyndin að Kríu að fyrirmynd umgjarðar um stuðning við nýsköpun í Ísrael þar sem Yozma sjóðurinn hefur starfað frá 1993 á svipaðan hátt. Fiskifréttir sögðu einnig frá fjárfestingastefnu sjóðsins, m.a. hvernig fyrirkomulagið megi rekja til hvalveiða 19. aldar.

Segir í tilkynningu á vef stjórnarráðsins að mikill áhugi hafi verið fyrir mótframlagslánum Stuðnings-Kríu,og hafi því þurft að lækka lánsfjárhæðirnar sem hvert og eitt fyrirtæki fengi miðað við umsóknirnar. Alls verður 755 milljónum króna varið í fjárfestingar frá Stuðnings-Kríu í formi mótframlagslána.

Samtals 1,4 milljarðar í fjármögnun nýsköpunarfyrirtækjanna

Með framlagi Stuðnings-Kríu til fjármögnun nýsköpunarfyrirtækja samhliða fjármögnun einkafjárfesta hefur tæplega 1,4 milljarður króna í heild verið varið til fjármögnunar þessara tilteknu nýsköpunarfyrirtækja á síðustu mánuðum.

Í aðgerðum ríkisstjórnarinnar vegna heimsfaraldursins er lögð sérstök áhersla á að efla nýsköpun og tryggja rekstrargrundvöll sprota- og nýsköpunarfyrirtækja.

Stuðnings-Kría er tímabundið stuðningsúrræði stjórnvalda til lífvænlegra nýsköpunar- og sprotafyrirtækja sem vegna breyttra aðstæðna í fjármögnunarumhverfi nýsköpunar á heimsvísu í kjölfar Covid-19 faraldursins þurfa tímabundna aðstoð til að komast yfir hjallann.

Úrræðið er á grundvelli laga sem samþykkt voru á Alþingi í júní í sumar með frumvarpi nýsköpunarráðherra. Með Stuðnings-Kríu er hið opinbera að útvega fjármögnun til fyrirtækja sem einkafjárfestar hafa sjálfir trú á og þau kjör sem fyrirtækjunum standa til boða á einkafjármagni eru jöfnuð af Stuðnings-Kríu.

Nýsköpunarsjóður atvinnulífsins hefur umsjón með framkvæmd mótframlagslána en ákvörðun um veitingu lánanna voru teknar af sérstakri nefnd sem skipuð var af ráðherra nýsköpunarmála.

Þórdís Kolbrún Reykfjörð Gylfadóttir, nýsköpunarráðherra segir:

„Sprota- og nýsköpunarfyrirtæki hafa mikilvægu hlutverki að gegna í uppbyggingu atvinnulífsins. Í viðspyrnu er sérstaklega mikilvægt að byggja upp á þessum vettvangi. Stuðnings-Kría nýtist í því ótrygga ástandi sem nú ríkir og fjöldi umsókna sýnir þörfina á þessu framtaki og mikilvægi þess að styðja enn frekar við nýsköpun til framtíðar.“