Átta starfsmönnum hugbúnaðarþróunardeildar Símans var sagt upp fyrir helgi og var deildin lögð niður. Þetta hefur Guðmundur Jóhannesson, samskiptafulltrúi Símans staðfest í samtali við mbl.is sem greindi fyrst frá málinu.
Hugbúnaðarþróun sem snýr að rekstri og þróun viðskiptamannakerfa hefur verið útvistað til Deloitte á Íslandi og í Portúgal. Alls störfuðu 24 í deildinni sem lögð var niður en tveir þeirra ganga inn í aðrar deildir innan Símans og fjórtán fá ný störf hjá Deloitte.
„Viðskiptamannakerfi Símans eru flókin, byggjast mörg á gömlum grunni og erfitt hefur reynst að nútímavæða þau. Því stígum við það skref að semja við Deloitte sem tekur yfir rekstur og þróun núverandi kerfa og hjálpar okkur að byggja upp nýtt sveigjanlegt, nútímalegt kerfi sem mun byggjast á gullstöðlum um hvernig svona kerfi eiga að vera hjá fjarskiptafyrirtækum.“
Kemur fram í skriflegu svari frá Símanum vegna fyrirspurnar mbl.is um uppsagnirnar.
