Skiptum á þrotabúi bílaleigunnar GK-ACR ehf., sem áður hét Auto Car Rental ehf., lauk nýverið og námu lýstar kröfur um 827 milljónum króna.
Félagið, sem rak bílaleigu, var tekið til gjaldþrotaskipta í febrúar árið 2019 og lauk skiptum á því í lok júní á þessu ári. Í síðasta ársreikningi félagsins, fyrir árið 2016, var eigið fé félagsins neikvætt um 24 milljónir. Skuldir félagsins námu 153 milljónum króna og þar af voru skuldir við tengda aðila 51 milljón króna.
Síðasta reikningsár félagsins með jákvætt eigið fé var árið 2013 þegar að það nam 250 þúsund krónum. Árið 2014 var það neikvætt um 5,5 milljónir króna og árið 2015 var það neikvætt um 18 milljónir króna.
Í lok árs 2016 var GK-ACR ehf. að fullu í eigu eignarhaldsfélagsins Grákletts ehf., sem er að fullu í eigu Vignis Óskarssonar. Vignir er meðstjórandi í bílaleigunni Geysi en í lok árs 2019 áti hann 20% í félaginu gegnum tvö félög, 9% í gegnum hið gjaldþrota félag GK-ACR og 11% í gegnum Orange Car Rental. Aðaleigandi Geysis, með 80% hlut, er Garðar K. Vilhjálmsson.
Í lok árs 2019 átti Vignir, í gegnum Gráklett, meðal annars 100% eignarhlut í Orange Car Rental og leigufélaginu Fasteignageirinn. Félagið á einnig 20% hlut í Voot sem samkvæmt heimasíðu fyrirtækisins veitir alhliða þjónustu fyrir sjávarútveginn.
