Karl Axelsson hefur verið settur dómari við Hæstarétt frá 16. október nk. til 15. apríl 2015. Hann leysir Viðar Má Matthíasson sem nú er dómari við réttinn af á meðan sá síðarnefndi skrifar bók um vátryggingarétt.

Aðspurður segir Karl að dómarastarfið leggist ljómandi vel í sig. „Það hefur lengi verið talað um þörf á því að lögmenn komi að dómarastörfum í landinu svo að dómarar séu ekki einsleitur hópur," segir hann. Setning hans í dómarastól sé ákveðin viðurkenning á því að sá hópur sé helst til einsleitur.

Hvað skjólstæðinga Karls varðar munu aðrir lögmenn á Lex lögmannsstofu taka að sér verkefni og hagsmunagæslu fyrir þá. „Það samræmist auðvitað ekki dómarastarfinu að gegna lögmannsstörfum á meðan," segir Karl.