Eitt stærsta bjórsetur landsins hefur verið opnað á Granda, nánar tiltekið á Eyjaslóð. Staðurinn rúmar allt að 200 manns og hefur mikið verið lagt í hönnun hans, en heildarfjárfestingin í staðnum er yfir 100 milljónir króna. Þetta kemur fram í tilkynningu.
Þar segir að fimm aðskildir barir séu inni á staðnum og er hver þeirra með sitt þema. Meðal annars hafi barinn veglegi, sem áður prýddi Cafe Amsterdam í Tryggvagötu, verið nánast endurskapaður í heilu lagi á staðnum.
Ægisgarður er ekki hefðbundinn skemmtistaður, heldur er hann hugsaður eingöngu fyrir hópa, frá 15 upp í 200 manns, sem koma til að taka þátt í bragðprófunum á ólíkum bjórtegundum, pöbb-kvissi og og fræðast um íslenskan bjór og bjórmenningu. Gestgjafi Ægisgarðs er Ólafur S.K. Þorvaldz, leikari, en hann stýrir skemmtidagskrá fyrir hópa sem sækja munu staðinn, gjarnan í fullum víkingaklæðum.
Fram kemur í tilkynningunni að lokaðir veitinga- og skemmtistaðir af þessu tagi njóti sívaxandi vinsælda í stórborgum erlendis. Sú bylgja haldist í hendur við breytta vinnustaðamenningu, en rannsóknir sýni að vinnufélagar fari æ oftar út saman, hvort sem er í hópefli, hvataferðir eða án sérstaks tilefnis.
