Landsbankinn hefur hug á að selja fjórðungshlut í Framtakssjóði Íslands eða þar um bil. Þetta kemur fram í svari bankans við fyrirspurn VB.is.
Eigendur Framtakssjóðsins eru annars vegar lífeyrissjóðir og hins vegar á Landsbankinn tæplega 28% hlut. „Við höfum því látið aðra eigendur vita að við viljum selja einhvern hluta af okkar hlutafé, það má vera um fjórðungur af okkar eign eða þar um bil, veltur á framgangi samninga. Þetta er í farvegi og við bíðum viðbragða sem stendur,“ segir í svari Landsbankans.
Landsbankinn er stærsti eigandinn, þar á eftir kemur Lífeyrissjóður verzlunarmanna með 19,91%, Gildi lífeyrissjóður með 10,39%, Sameinaði lífeyrissjóðurinn með 7,72% og Lífeyrissjóður starfsmanna ríkisins með 7,36%.
