Sala áfengis í október var 15,3% minni í lítrum talið en í október árið 2008.
Þetta kemur fram á vef Vínbúðarinnar en þar segir að meginástæðu fyrir þessum mikla mun megi rekja til þess að 31. október í fyrra kom mikill fjöldi viðskiptavina í Vínbúðirnar í kjölfar frétta í fjölmiðlum um yfirvofandi hækkun á áfengisgjaldi.
„Þann dag komu tæplega 44 þúsund viðskiptavinir í Vínbúðirnar en á hefðbundnum föstudegi koma að meðaltali um 29 þús. viðskiptavinir,“ segir á vef Vínbúðarinnar.
Fram kemur að sala áfengis í lítrum tímabilið janúar til október dróst saman um 1,6%. Það sem af er árinu hefur sala á rauðvíni dregist saman um 16,6%, blönduðum drykkjum um 37% og ókrydduðu brennivíni og vodka um 10,5%. Sala á hvítvíni jókst hins vegar á milli ára um 3,4% og sala lagerbjórs jókst um 0,1%.