Viðskiptajöfnuður við útlönd á fjórða ársfjórðungi mældist hagstæður um 26,7 milljarða króna samanborið við 43,2 milljarða króna hagstæðan jöfnuð fjórðunginn á undan. Vöruskiptajöfnuður var hagstæður sem nemur 15,4 milljarða og þjónustujöfnuður um 11,8 milljarða króna. Jöfnuður frumþáttatekna var hagstæður um 3,2 milljarða en rekstrarframlög voru óhagstæð sem nam 3,8 milljörðum. Viðskiptajöfnuður án áhrifa innlánsstofnana í slitameðferð var hagstæður um 35,6 milljarða króna samanborið við 52,7 milljarða fjórðunginn á undan. Kemur þetta fram í frétt á vefsíðu Seðlabanka Íslands.
Afgangur af þáttatekjum mældist síðast á þriðja ársfjórðungi ársins 2007. Þrátt fyrir afgang nú voru neikvæð áhrif innlánsstofnana í slitameðferð engu að síður mikil, að því er segir í fréttinni. Reiknuð gjöld vegna þeirra námu 14,5 milljörðum króna og tekjur um 5,6 milljarðar. Neikvæð áhrif innlánsstofnana í slitameðferð á þáttatekjujöfnuð námu 8,9 milljörðum. Þáttatekjur án áhrifa þeirra voru því hagstæðar um 12,1 milljarða króna.
Erlendar eignir þjóðarbúsins námu 5.279 milljörðum króna í lok ársfjórðungsins en skuldir 13.113 milljörðum. Hrein staða við útlönd var því neikvæð um 7.835 milljarða og hækkuðu nettóskuldir um 215 milljarða króna á milli ársfjórðunga. Að frátöldum innlánsstofnunum í slitameðferð námu eignir þjóðarbúsins 3.712 milljörðum og skuldir 3.833 milljörðum króna. Hrein staða var því neikvæð um 121 milljarð króna og hækkuðu nettóskuldir um 17 milljarða á ársfjórðungnum.
Fjármagnsviðskipti voru töluverð á ársfjórðungnum og lækkuðu erlendar eignir um 403 milljarða króna vegna þeirra en á móti lækkuðu skuldir um 475 milljarða. Hrein fjármagnsviðskipti leiddu því til um 72 milljarða króna bættrar erlendrar stöðu. Hin miklu fjármagnsviðskipti má að stórum hluta rekja til greiðslu slitastjórnar Landsbankans til forgangskröfuhafa sem nam rúmum 400 milljörðum króna en einnig greiddi Seðlabankinn fyrirfram tæpa 50 milljarða inn á hluta lána frá Alþjóðagjaldeyrissjóðnum.
Áhrif gengisbreytinga á erlenda stöðu þjóðarbúsins voru töluverð en sem dæmi lækkaði gengi krónunnar um tæplega 5% gagnvart Bandaríkjadal og um 1% gagnvart sterlingspundi og evru. Í heild hækkaði þó gengi krónu um 0,5% miðað við gengisskráningarvog. Verð erlendra hluta- og skuldabréfa hækkaði að meðaltali um innan við 1%. Samanlögð áhrif gengis- og verðbreytinga leiddu til lakari stöðu sem nam 187 milljarða króna en á ársfjórðungnum hækkuðu erlendar eignir um 95 milljarða og erlendar skuldir um 283 milljarða króna vegna þeirra. Aðrar breytingar á eignum og skuldum leiddu til lakari stöðu sem nam 100 milljörðum króna.
