Íslenskar krónur erlendra aðila námu 327 milljörðum króna í lok síðasta árs, en stóðu í 565 milljörðum króna kjölfar hruns fjármálakerfisins árið 2008. Þetta kemur fram í greinargerð fjármála- og efnahagsráðuneytisins um framgang áætlunar um losun fjármagnshafta
Í greinargerðinni segir að Seðalbankinn hafi lækkað stöðu aflandskróna bæði með sérstökum viðskiptum og útboðum í samræmi við áætlun um afnám hafta frá mars 2011. Með útboðum Seðlabankans hafi erlendum skammtíma fjárfestum í aflandskrónum markvisst verið hleypt út og þar með dregið úr þeim hluta aflandskróna sem séu í höndum þeirra sem vilja innleysa fjárfestingu sína nær óháð gengi.
„Samhliða þessari lækkun hefur samsetning þessara eigna breyst verulega. Meirihluti lækkunarinnar hefur verið í innstæðum en erlendir aðilar hafa einnig aukið líftíma eigna sinna í skuldabréfum ríkissjóðs. Við áramót voru um 177 milljarðar aflandskróna í ríkisskuldabréfum, 136 ma.kr. í innstæðum og 14 ma.kr. í skuldabréfum íbúðalánasjóðs. Upphæð aflandskróna í innstæðum hefur ekki breyst verulega frá miðju ári 2013 á meðan fjárfestingar aflandskróna í ríkisskuldabréfum í hafa lækkað nokkuð. Er þetta nokkur breyting frá því sem áður var,“ segir í greinargerðinni.
