Aflaverðmæti íslenskra skipa nam rúmum 153 milljörðum króna á öllu síðasta ári. Þetta er 20 milljörðum meira en árið 2010, samkvæmt tölum Hagstofunnar. Þetta er jafnframt 15,3% aukning á milli ára.
Aflaverðmæti botnfisks á síðasta ári nam tæpum 96 milljörðum króna sem er 2 milljörðum meira en árið 2010 og nemur það 2,4% aukningu. Verðmæti þorskafla var um 46,4 milljarðar og jókst um 4% frá fyrra ári. Aflaverðmæti ýsu nam 12 milljörðum og dróst saman um 21,3%, en verðmæti karfaaflans nam 15 milljörðum, sem er 24,7% aukning frá árinu 2010. Verðmæti ufsaaflans jókst um 7,8% milli ára í 9,1 milljarð.
Verðmæti flatfiskafla nam 10,3 milljörðum króna á árinu 2011 sem er 12,5% aukning frá fyrra ári. Aflaverðmæti uppsjávarafla jókst um 56,9% milli ára og nam 43,3 milljörðum. Stafar sú aukning að stærstum hluta af verðmætaaukningu makrílaflans, sem nam tæpum 18 milljörðum króna á árinu 2011 og jókst um 10 milljarða milli ára. Verðmæti loðnuaflans nam 8,9 milljörðum króna og jókst um 237% á milli ára.
Verðmæti afla sem seldur er í beinni sölu útgerða til vinnslu innanlands nam 63,8 milljörðum króna á árinu 2011 og jókst um 17,5% frá fyrra ári. Aflaverðmæti sjófrystingar var 62,5 milljarðar sem er 26,3% aukning frá fyrra ári. Verðmæti afla sem keyptur er á markaði til vinnslu innanlands nam um 19,3 milljörðum króna, sem er 1,8% aukning milli ára.
