Verðmæti afla upp úr sjó nam rúmum 19,1 milljarði í mars, 51,7% meira en í mars á síðasta ári. Vegur þar þyngst aflaverðmæti loðnu sem nam rúmum 4,9 milljörðum samanborið við 1,1 milljarð í mars 2014, að því er fram kemur í frétt Hagstofunnar .
Aflaverðmæti botnfisks nam rúmum 13,1 milljarði í mars sem er 22,7% aukning frá fyrra ári. Þorskurinn er sem fyrr verðmætastur botnfisktegunda en aflaverðmæti hans var rúmir 8,7 milljarðar í mars og jókst um tæp 30% samanborið við mars 2014.
Aflaverðmæti íslenskra skipa á tólf mánaða tímabili frá apríl 2014 til mars 2015 nam tæpum 150 milljörðum og jókst um 6,5% miðað við sama tímabil ári áður. Verðmæti uppsjávarafla jókst um 27,1% milli tímabilanna, og munar þar mest um loðnu og kolmunna. Einnig jókst verðmæti þorsks um 15,2%.
