*

sunnudagur, 20. júní 2021
Innlent 22. september 2020 09:29

Áhrifin á ráðstefnuhald vara lengur

Íslandsstofa tekur við verkefnum Ráðstefnuborgarinnar Reykjavíkur vegna áhrifa heimsfaraldurs á viðburðaferðaþjónustu.

Ritstjórn
Ráðstefnu- og tónlistarhúsið Harpa við Reykjavíkurhöfn, sem og uppbygging Marriott hótelsins á næstu lóð, var ætluð að vera miðstöð ráðstefnuhalds sem drægi stóra erlenda viðburði til landsins. Pétur Þ. Óskarsson, að neðan er framkvæmdastjóri Íslandsstofu
Aðsend mynd

Íslandsstofa tekur við verkefnum Ráðstefnuborgarinnar Reykjavíkur, Meet in Reykjavík, sem er markaðsstofa um markaðssetningu Reykjavíkur og Íslands sem ráðstefnuvettvangs, vegna áhrifa kórónuveirufaraldursins á viðburðaferðaþjónustu sem bæði byrjaði fyrr og virðist ætla að vara lengur en önnur áhrif Covid 19 á ferðaþjónustu að mati framkvæmdastjóra Íslandsstofu.

Borgarráð Reykjavíkur hefur samþykkt samning milli Íslandsstofu, Reykjavíkurborgar, Icelandair Group hf. og Hörpu tónlistar- og ráðstefnuhús ohf. þess efnis að Íslandsstofa taki að sér rekstur markaðsverkefnisins Ráðstefnuborgin Reykjavík (Meet in Reykjavík). Áður hafði samningurinn verið samþykktur á auka aðalfundi Meet in Reykjavík og af stjórn Íslandsstofu.

Meet in Reykjavík var stofnað árið 2012 í þeim tilgangi að kynna og markaðssetja Reykjavík og Ísland sem áfangastað fyrir fundi, ráðstefnur, hvataferðir og viðburði. Félagið hefur verið rekið sem samvinnuverkefni opinberra aðila og einkaaðila og gerir samningurinn ráð fyrir að svo verði áfram. Í dag eru um 40 fyrirtæki með aðild að félaginu.

Markmiðið með samningum er fyrst og fremst að styrkja stöðu verkefnisins með það fyrir augum að efla kynningu á áfangastaðnum. Tryggja fjármögnun þess til langstíma og ná fram rekstrarhagræði þannig að hærra hlutfall fjármagns renni til beinna markaðsaðgerða.

Samningurinn gefur tækifæri til að samnýta aðföng, sérhæfða stoðþjónustu, reynslu og þekkingu starfsfólks, samræma ímyndarskilaboð og áherslur í kynningu. Unnið verður í samræmi við stefnu íslenskrar ferðaþjónustu, útflutningsstefnu Íslands og ferðamálastefnu Reykjavíkurborgar.

Pétur Þ. Óskarsson framkvæmdastjóri Íslandsstofu segir starfsemi Meet in Reykjavík  falla vel að stefnu og starfsemi Íslandsstofu.

„Ráðstefnu-  og hvataferðaþjónusta er mikilvægur liður í að auka verðmætasköpun í ferðaþjónustu þegar horft er til langs tíma. Áhrif COVID-19 faraldursins komu snemma fram í þessu geira og því miður er ýmislegt sem bendir til þess að hann verði lengur að ná fyrri styrk en önnur ferðaþjónusta,“ segir Pétur.

„Það er því mikilvægara en nokkru sinni að sameina kraftana. Það eru þó fjöldi tækifæra í þessu ástandi fyrir okkur; ímynd áfangastaðarins er sterk og viðbrögð Íslands við COVID-19 hafa víða fengið jákvæða athygli. Þá höfum við tæknilega getu til þess að mæta auknum kröfum um stafrænar lausnir í ráðstefnu og fundarhaldi.“

Arna Schram sviðsstjóri menningar- og ferðamálasviðs Reykjavíkurborgar og stjórnarformaður Meet in Reykjavík segir samninginn í takt við þann vilja borgarinnar að leggja áherslu á fjölþjóðlegt funda- og ráðstefnuhald við frekari uppbyggingu ferðaþjónustu í borginni.

„Samningurinn tryggir framtíð verkefnisins Meet in Reykjavík og að byggt verði ofan á þann góða árangur sem þegar hefur náðst til að fjölga ráðstefnugestum í borginni. Með samstarfinu við Íslandsstofu vonumst við til þess að slagkrafturinn verði enn meiri enda eru sett metnaðarfull markmið um fjölgun ráðstefnugesta í drögum að nýrri ferðamálastefnu Reykjavíkurborgar. Slíkir gestir hafa verið flokkaðir sem betur borgandi gestir; þeir eyða meiru, eru umhverfisvænni og koma frekar utan háannatíma í ferðaþjónustu,“ segir Arna.