Air Greenland hefur keypt þrjátíu prósent hlut í Norðurflugi en fjárfestingin nemur um tvö hundruð milljónum króna. Greint er frá þessu á mbl.is .
Þar kemur fram að með kaupunum taki Norðurflug yfir tvær þyrlur frá Air Greenland auk þess sem önnur verði í láni í vetur og næsta sumar. Þyrlum Norðurflugs fjölgar þannig úr tveimur í fimm.
Birgir Ómar Haraldsson, framkvæmdastjóri Norðurflugs, segir í samtali við mbl.is að félögin hafi átt í góðu samstarfi síðustu fimm ár. Mikill vöxtur hafi verið í starfseminni á liðnum árum og segir hann að fleiri þyrlur bjóði upp á fleiri ferðir og meiri sveigjanleika í bókunum.