Airbus er stærsti flugvélaframleiðandi þriðja árið í röð. Þetta kemur fram í grein Financial Times.
Airbus hafði sett sér markmið að afhenda 600 flugvélar á árinu, en flugvélaframleiðandinn afhenti 611 vélar í fyrra, 8% aukning frá árinu 2020. A320 vélin var gríðarlega vinsæl hjá Airbus, en meira en tveir þriðju afhendinga voru slíkar vélar. Til samanburðar hafði Boeing afhent 302 vélar í heildina undir lok nóvembermánaðar í fyrra.
Airbus fékk í heildina 771 pantanir í farþegaþotur á árinu 2021. Boeing hafði fengið 829 pantanir í lok nóvember í fyrra og hefur því tekið á móti fleiri pöntunum á árinu.
Í frétt FT segir Guillaume Faury, forstjóri Airbus, að félagið stefni á að auka framleiðslu á A320 vélum. Stefnan sé sett á að framleiða 65 slíkar vélar í hverjum mánuði fyrir sumarið 2023.
Airbus tók fyrst fram úr Boeing í flugvélaframleiðslu árið 2019 þegar Boeing 737 Max flugvélarnar voru kyrrsettar. Síðan þá hefur Airbus haldið sæti sínu sem stærsti flugvélaframleiðandi heims.
