*

þriðjudagur, 13. apríl 2021
Erlent 6. janúar 2021 08:12

Airbus skýtur Boeing ref fyrir rass

Talið er að Airbus hafi skilað af sér yfir 560 flugvélapöntunum á síðasta ári. Afhendingar Boeing talsvert færri.

Ritstjórn

Flugvélaframleiðandinn Airbus skilaði af sér meira en 560 flugvélapöntunum á síðast ári, samkvæmt heimildarmönnum Reuters. Þar af leiðandi lítur út fyrir að félagið muni skjóta erkifjendum sínum, Boeing, ref fyrir rass annað árið í röð í baráttunni um að vera stærsti flugvélaframleiðandi heims.

Markmið Airbus á árinu ku hafa verið að afhenda 560 þotur til eigenda sinna á þessu ári og líkt og fyrr segir virðist það markmið hafa náðst, og gott betur. Forsvarsmenn Airbus hafa þó neitað að staðfesta umræddar fregnir en mun greina frá því opinberlega á næstu dögum hve margar pantanir félagið skilaði af sér á árinu.

Svo virðist vera sem að Airbus hafi mikla yfirburði í samanburði við Boeing, sem afhendi aðeins 118 þotur frá byrjun árs 2020 til og loka nóvembermánaðar. Á því tímabili voru 737 Max þotur félagsins enn kyrrsettar á alþjóðavísu.

Stikkorð: Boeing Airbus