Fyrrverandi eigandi netverslunarinnar buy.is og bestbuy.is hefur verið ákærður ásamt eiginkonu sinni af embætti héraðssaksóknara vegna 102 milljóna skattsvika. Þetta kemur fram á mbl.is .
Samkvæmt fréttinni er hann bæði sakaður um að hafa skotið undan, með því að villa fyrir í virðisaukaskattsgreiðslum hjá tveimur fyrirtækjum sem hann var í forsvari fyrir, en auk þess gaf hann ekki upp 41,2 milljóna króna tekjur sínar sem hann hafði á árunum 2011 til 2013. Með þessu sveik hann um 16,5 milljónir í tekjuskatt.
Manninum er einnig gert að hafa skilað röngum virðisaukaskattsskýrslum upp á samtals 83,6 milljónir á árunum 2012-2013 fyrir félagið Gegn einokun ehf. Samtals er því um að ræða skattalagabrot upp á rúmlega 102 milljónir króna.
Sakaður um kennitöluflakk
Málið kom fyrst upp í umfjöllun fjölmiðla árið 2012 þegar DV fjallaði um meint brot mannsins í tengslum við sölu á ýmiskonar tölvubúnaði, meðal annars Apple-vörum. Umboðsaðilar Apple á Íslandi höfðu þá tjáð sig um viðskiptahætti mannsins og sökuðu hann um kennitöluflakk. Maðurinn hefur þó verið tengdur við ýmiskonar umdeilda viðskiptahætti.
Ákærð fyrir peningaþvætti
Samkvæmt ákærunni á hann einnig að hafa notað 21,3 milljónir af meintum undanskotum fyrirtækisins til að greiða kreditkortareikninga sína og eiginkonu sinnar sem einnig er ákærð í málinu. Þá fóru 11,5 milljónir inn á reikning konunnar og var þeim ráðstafað í fasteignakaup. Eru þau bæði ákærð fyrir peningaþvætti vegna þessa hluta málsins.
Farið er fram á 5,1 milljón á reikning konunnar verði gerð upptæk sem og mikill fjöldi raf- og tölvutækja. Meðal annars er um að ræða 42 stykki af Samsung-farsímum, hundruð minnislykla, fartölvur og fjölmarga aðra farsíma og raftæki ýmiskonar.