Flugvélaleigan Air Lease Corporation (ALC) hefur sent frá sér tilkynningu þar sem kyrrsetning Isavia á flugvél í eigu félagsins er harðlega gagnrýnd. Eins og áður hefur verið greint frá þá leigði Wow air 7 flugvélar af ALC en umrædd vél hefur verið meinuð brottför af landinu allt frá því að Wow air fór í þrot.

Í tilkynningunni segir ALC að Isavia segist ekki ætla að láta þotuna af hendi nema ALC standi skil á öllum skuldum Wow air við Keflavíkuflugvöll. Þá telur ALC „fráleitt að lögaðili á Íslandi geti lagt fram eigur annarra sem veð og undrast að opinbert hlutafélag taki þátt í samkomulagi um slíkt og telji það í samræmi við ákvæði loftferðarlaga.“

ALC segir að tjón félagsins sé umtalsvert vegna málsins, þar sem að búið var að semja um að leigja þotuna til annars flugfélags, og tjónið aukist með hverjum deginum sem líður.

Þá segir í lok tilkynningarinnar að málið hafi þegar valdið Íslandi og íslenskum stjórnvöldum álitshnekki og að fyrirtæki í flugiðnaði fylgist af áhuga með framvindunni.

Tilkynningu ALC má sjá í heild hér að neðan:

Air Lease Corporation (ALC) áskilur sér allan rétt til að krefja Isavia ohf. og íslenska ríkið um bætur vegna tjóns sem félagið hefur orðið fyrir vegna öftrunar Isavia á brottför farþegaþotu félagsins, Airbus A321 TF-GPA, frá Keflavík. Vélinni hefur verið meinuð brottför í nærri fjórar vikur, allt frá gjaldþroti WOW air.

Isavia segist ekki munu láta þotuna af hendi nema ALC standi skil á öllum skuldum WOW air við Keflavíkurflugvöll sem söfnuðust upp síðustu 9 mánuði rekstrar WOW air, upp á ríflega tvo milljarða króna. ALC telur fráleitt að lögaðili á Íslandi geti lagt fram eigur annara sem veð og undrast að opinbert hlutafélag taki þátt í samkomulagi um slíkt og telji það í samræmi við ákvæði loftferðalaga. Þrátt fyrir ítrekaðar beiðnir hefur Isavia ekki heldur fengist til að leggja fram sundurliðun gjaldanna að baki skuld WOW air.

Dómsmál ALC á hendur Isavia til að fá eign sína afhenta var tekið fyrir í Héraðsdómi Reykjaness á þriðjudag. Dómari veitti Isavia vikufrest til að leggja fram greinargerð og afla gagna, en málflutningur fer fram 2. maí næstkomandi. ALC telur að með framgöngu sinni hafi Isavia brotið gegn eignarréttarákvæðum stjórnarskrár, auk þess sem WOW air, vegna gjaldþrots síns, hafi ekki lengur haft yfirráð yfir farþegaþotunni þegar henni var meinuð brottför og því geti Isavia ekki byggt á heimild loftferðalaga til að stöðva för þotunnar.

Tjón ALC vegna aðgerða Isavia er umtalsvert og eykst með hverjum degi, því búið var að skrifa undir samninga um að leigja þotuna TF-GPA til annars flugfélags. WOW air hafði samþykkt, áður en til gjaldþrotsins kom, að afhenda ALC hana nú í apríl.

Steve Udvar-Házy, stofnandi og starfandi stjórnarformaður Air Lease Corporation:

„Framganga Isavia og krafa um að óskylt fyrirtæki gangist í ábyrgðir fyrir skuldum sem til eru komnar án vitundar þess og Isavia ber sjálft ábyrgð á að hafa leyft WOW air að safna hjá sér, er í senn ófyrirleitin og óskiljanleg.

Þá vekur málatilbúnaðurinn allur upp alvarlegar spurningar um framgöngu Isavia og hvernig félagið hefur gert upp á milli flugrekenda. Á meðan WOW air var á laun, að minnsta kosti frá júlí 2018, heimilað að safna fordæmalausum skuldum við Isavia hafa önnur flugfélög sem til Íslands fljúga þurft að greiða öll flugvallargjöld á tíma og í samræmi við reglur. Í þeim hópi eru félög á borð við Icelandair, Wizz Air, SAS, EasyJet, Atlantic Airways, British Airways, Delta, og Lufthansa. Ekki er að sjá að stuðningur Isavia við einn flugrekanda umfram aðra eigi nokkra stoð í lögum eða reglum.

Einnig hlýtur að vekja spurningar að Isavia skuli hafa á laun samið við WOW air um að flugfélagið hefði öllum stundum flugvél í eigu annarra á Keflavíkurflugvelli sem tryggingu. ALC, sem einn af leigusölum WOW air, var aldrei upplýst um að eigur félagsins væru notaðar með þessum hætti og hefði aldrei samþykkt það.

ALC kemur til með að leita allra leiða til að fá hnekkt ákvörðunum Isavia og endurheimta réttmæta eign sína. Félagið mun leita liðsinnis hverra þeirra stofnana sem að þessum málum koma og láta sig varða viðskipti fyrirtækja á alþjóðavettvangi, svo sem til Alþjóðasambands flugfélaga (IATA), Alþjóðaflugmálastofnunarinnar (ICAO), stjórnvalda í Bandaríkjunum og stofnana Evrópusambandsins.

Málið hefur þegar valdið Íslandi og íslenskum stjórnvöldum álitshnekki og fylgjast fyrirtæki í flugiðnaði af áhuga með framvindunni.