Alcoa Fjarðaál hefur endurnýjað samstarfssamninga við Eimskip að undangengnu alþjóðlegu útboði um hafnarvinnu fyrir álverið við Mjóeyrarhöfn á Reyðarfirði til næstu fimm ára. Eimskip hefur annast þessa þjónustu fyrir Alcoa frá gangsetningu álversins árið 2007.
Eimskip hefur lagt í rúmlega tveggja milljarða króna fjárfestingu á Austurlandi í tengslum við þjónustuna fyrir Alcoa og vegna annarrar starfsemi félagsins á svæðinu. Hjá Eimskip á Austurlandi starfa nú um 100 manns við frágang á vörum Fjarðaáls til útflutnings, hafnarvinnu, gámaflutninga og innanlandsflutninga.
Flutningar til og frá Austurlandi hafa aukist verulega með tilkomu Mjóeyrarhafnar, en árlega fara um 1,5 milljónir tonna af vörum um höfnina.
