Alexandra Helga Ívarsdóttir, eiginkona Gylfa Sigurðssonar, festi kaup á verslunarhúsnæði í Ármúla 40, í gegnum félagið sitt Santé North ehf., fyrir 260 milljónir króna í lok síðasta árs. Samkvæmt kaupsamningi var eignin - 547 fermetra verslun og 319 fermetra vörugeymsla - afhent í lok desember. Ekki náðist í Alexöndru Helgu við vinnslu fréttarinnar.
Alexandra Helga stofnaði félagið Móa&Mía ehf. með Móeiði Lárusdóttur í fyrra. Þær opnuðu samnefnda netverslun, sem býður upp á úrval barnafata og annarra barnavara, um mitt síðasta ár.
Von flytur í verslun Bíum Bíum
Verslunarhúsnæðið að Ármúla 40 hefur hýst barnavöruverslunina Von verslun, í eigu Eyrúnar Önnu Tryggvadóttur og Olgu Helenu Ólafsdóttur, undanfarin tvö ár.
Eyrún Anna segir í samtali við Viðskiptablaðið að Von muni á næstu vikum flytja inn í húsnæði verslunarinnar Bíum Bíum, sem þær eignuðust nýlega, að Síðumúla 21. Frá því að þær tóku við Bíum Bíum í september hafi staðið til að sameina verslanirnar tvær undir sama þaki en halda í bæði vörumerkin.
„Á næstu dögum hefjast allsherjar framkvæmdir í húsnæðinu í Síðumúla 21. Við stækkum verslunarrýmið til muna, breytum skipulaginu og gerum búðina fallega,“ segir Eyrún Anna. „Það passar fullkomlega að hafa verslanirnar í sama rými en það felur í sér hagræðingu og veitir okkur betri yfirsýn. Við erum fullar tilhlökkunar og spenntar fyrir komandi tímum.“
Fjallað er um málið í Viðskiptablaðinu sem kemur út í fyrramálið.
