Stjórn ítalska flugfélagsins Alitalia hefur samþykkt tilboð frá Etihad Airways, flugfélagi í Abu Dhabi um 49% hlut í Alitalia. En ítalska flugfélagið Alitalia er á barmi gjaldþrots. Þessu greinir Ríkisútvarpið frá.
Stjórnarformaður Alitalia, Roberto Colaninno, og forstjóri, Gabriele Del Torchio, hafa stýrt viðræðum við arabíska flugfélagið en Etihad hefur í marga mánuði reynt að eignast hlut í ítalska flugfélaginu.
Skuldir Alitalia eru gríðarlegar og talið er að segja þurfi upp 2.200 starfsmönnum félagsins, samkvæmt samkomulaginu. En alls starfa 12.800 hjá Alitalia.
Etihad ætlar að leggja 1,25 milljarða evra inn í rekstur Alitalia á næstu fjórum árum.