Héraðsdómur Reykjaness sýknaði í dag Karl Löve Jóhannesson, Gísla Reynisson, Markús Mána Michaelsson Maute og Ólaf Sigmundsson í Aserta-málinu svokallaða.
Sérstakur saksóknari gaf út ákæru á hendur fjórmenningunum og voru þeir ákærðir fyrir að hafa brotið gegn lögum um gjaldeyrismál með ólögmætum gjaldeyrisviðskiptum.
Ekki liggur fyrir hvort málinu verði áfrýjað til Hæstaréttar.
Vakti mikla athygli
Nafnið á málinu vísar til sænska félagsins Aserta AB sem fjórmenningarnir tengdust. Málið vakti mikla athygli á sínum tíma og í janúar 2010 var haldinn sérstakur blaðamannafundur að frumkvæði Seðlabankans í höfuðstöðvum Ríkislögreglustjóra þar sem fjallað var um málið.
Málið var til rannsóknar í rúm þrjú ár en þetta var fyrsta ákæran sem gefin er út fyrir meint brot á lögum um gjaldeyrishöft.
