Kaup Amazon á Whole Foods smásölukeðjunni síðasta sumar virðast strax vera farin að hafa áhrif á matvörusölu Amazon að því er kemur fram á vef The Wall Street Journal.

Vörur Whole Foods sem eru nú til sölu hjá AmazonFresh, sem er heimsendingarþjónusta Amazon á matvörum hefur aukið sölu sína um 35% á síðustu 4 mánuðum ársins miðað við mánuðinaá undan.

Meðal best seldu varanna er lífrænn barnaspínat, rifinn Parmesan ostur, lífrænt blómkál, ósaltað smjör og reykt beikon samkvæmt nýrri greiningu One Click Retail.

Netverslun með matvöru er enn hlutfallslega lítil eða um 3% af 800 milljarða dala markaði. Greinendur búast hins vegar við að netverslun auki hlutdeild sína upp í a.m.k 10% á næstu fimm árum. Heildarsala Amazon á matvörum var um 2 milljarðar dala samkvæmt skýrslu One Click.