Bandaríska kreditkorta- og ferðaþjónustufyrirtækið American Express (AMEX) tilkynnti í dag að félagið myndi segja upp allt að sjö þúsund manns og endurskoða fjárfestingastefnu sína og rekstrarkostnað.
Þetta kemur fram á fréttavef Reuters.
Samkvæmt áætlun munu aðgerðirnar spara félaginu um 1,8 milljarða Bandaríkjadali á næsta ári en þar af reiknað með að um 700 milljónir dala sparist með fækkun starfsmanna, afnámi kaupauka og bónusa auk þess sem ekki verður ráðið í nýjar stöður.
Þá gerir félagið ráð fyrir að spara um 125 milljónir dala í ferðakostnað, ráðgjöf og aðra afþreyingu.
Að lokum er gert ráð fyrir sparnaði upp á einn milljarð dollara í minnkandi umsvifum fjárfestinga á borð við tækni- og viðskiptaþróun.
„Þessar aðgerðir munu auðvelda okkur að fara í gegnum erfiðasta tímabil sem við höfum séð á mörkuðum í áratugi,“ sagði Kenneth Chenault, stjórnarformaður AMEX í tilkynningu frá félaginu.
Gengi hlutabréfa í félaginu hefur hækkað um tæp 5% á Wall Street í dag en hefur engu að síður lækkað um rúm 50% það sem af er ári.