Í byrjun árs 2008 varð eitt stærsta fyrirtæki landsins á sínu sviði til þegar Ölgerðin Egill Skallagrímsson og heildverslunin Danól sameinuðust en Ölgerðin hafði nokkrum árum áður keypt Danól af fyrri eigendum. Þetta risavaxna fyrirtæki, sem veltir um 17 milljörðum króna á ársgrundvelli, gekk þó í gegnum nokkra erfiðleika í kjölfar efnahagshrunsins haustið 2008 þegar erlend skuldastaða þess magnaðist upp eins og hjá öðrum sem voru með erlend lán á efnahagsreikningi sínum. Þrátt fyrir að félagið hafi staðið í skilum þá var eigið fé þess neikvætt á þessu tíma.
„Þetta var þrautaganga. Fyrirtækið stóð alltaf í skilum og greiddi af lánum sínum en eigið fé var neikvætt á þessum tíma og skuldastaðan hefði orðið óbærileg með tímanum,“ segir Andri Þór Guðmundsson, forstjóri Ölgerðarinnar, aðspurður um aðdragandann að fjárhagslegri endurskipulagningu félagsins. Hann hafði fram að því verið einn af stærstu eigendum Ölgerðarinnar en hann ásamt fleiri stjórnendum Ölgerðarinnar keyptu félagið haustið 2007 í samstarfi við Kaupþing.
Það liggur beinast við að spyrja Andra Þór hvort félagið hafi verið komið á þann stað að vera á leið í þrot. Andri Þór svarar því neitandi og segir að aldrei hafi verið hætta á því enda hafi reksturinn alltaf staðið undir afborgunum af lánum. Þannig hafi rekstrarreikningurinn verið góður síðustu ár og áhrifin af hruninu hafi í raun ekki haft mikil áhrif á reksturinn sjálfan.
Andri Þór er í ítarlegu viðtali í Viðskiptablaðinu sem kom út í vikunni. Áskrifendur geta nálgast það og blaðið undir liðnum tölublöð hér að ofan.
