*

sunnudagur, 1. ágúst 2021
Innlent 18. júlí 2021 19:01

Andri og Októ greiða út 590 milljónir

Forstjóri og stjórnarformaður Ölgerðarinnar greiddu út 590 milljónir úr eignarhaldsfélagi sínu eftir sölu á 10% hlut í Ölgerðinni.

Ritstjórn
Andri Þór Guðmundsson, forstjóri Ölgerðarinnar
Birgir Ísl. Gunnarsson

Andri Þór Guðmundsson, forstjóri Ölgerðarinnar, og Októ Einarsson stjórnarformaður greiddu út 590 milljónir króna úr OA eignarhaldsfélagi, sem heldur utan um hlut þeirra í Ölgerðinni, með lækkun hlutafjár.

Útgreiðslan kemur í kjölfar sölu þeirra á 10% hlut í Ölgerðinni til Sindrandi, sem er í eigu hjónanna Boga Þórs Siguroddssonar og Lindu Bjarkar Ólafsdóttur, sem átti fyrir 4% hlut í fyrirtækinu. Í ársreikningi OA kemur fram að andvirði sölunnar hafi að mestu verið nýtt til að greiða upp 850 milljóna króna lán sem gjaldfellur síðar á árinu.

OA var fyrir söluna stærsti hluthafi Ölgerðarinnar með 26,1% hlut en er nú komið niður í 16,1%. Framtakssjóðirnir Horn III og Akur eru nú orðnir stærstu hluthafar Ölgerðarinnar með 25,1% og 18,2% hlut.

Hagnaður Ölgerðarinnar nam 729 milljónum króna á síðasta rekstrarári, sem miðast við mars 2020 til loka febrúar 2021. Félagið hagnaðist um 578 milljónir árið áður. Vörusala félagsins jókst um 0,8% á milli ára og nam 26,2 milljörðum króna. Bókfært eigið fé nam 6,2 milljörðum króna í lok febrúar, skuldir voru 14,3 milljarðar og eiginfjárhlutfallið því 30%.

Fyrr á árinu greindi Andri Þór frá því að félagið stefni að skráningu í Kauphöllina á næsta ári eða árið 2023.

Nánar er fjallað um málið í Viðskiptablaðinu. Áskrifendur geta nálgast blaðið undir Tölublöð, aðrir geta skráð sig í áskrift hér.