Lyfsalinn hefur opnað nýtt apótek í Orkuhúsinu í Urðarhvarfi 8 í Kópavogi. Markmiðið er að þjónusta vel þá viðskiptavini sem erindi eiga í Orkuhúsið, til læknis, í sjúkraþjálfun eða í röntgen segir í tilkynningu frá félaginu.
Í næsta nágrenni er Heilsugæslan í Urðarhvarfi en eins og Viðskiptablaðið fjallaði um í síðustu viku keypti 365, félag Ingibjargar Pálmadóttur, Urðarhvarf 14 á 1,5 milljarða króna á síðsta ári. Síðasta sumar flutti Orkuhúsið í Urðarhvarf 8 , sem er eitt stærsta skrifstofuhúsnæði landsins, en það stóð lengi autt í kjölfar fjármálakreppunnar og fékk það um tíma viðurnefnið Kreppuhöllin.
Þá voru um þriðjungur af þeim 17.500 fermetrum undir skrifstofurými sem eru í húsinu í útleigu og 6.000 fermetrar til viðbótar í skoðun, en markmiðið var að þar yrðu ýmis konar fyrirtæki í heilbrigðistengdum rekstri.
Vöruval nýja apóteksins miðast t.d. við að geta boðið upp á ýmiss konar stuðningsvörur og hlífar, auk þess sem kalla má hefðbundnar apóteksvörur. Leyfishafi Lyfsalans í Urðarhvarfi, María Jóhannsdóttir, er klínískur lyfjafræðingur, sérmenntuð í að ráðleggja öllum þeim sem þurfa á lyfjagjöf að halda.
Opið er í Urðarhvarfi frá kl. 8.30 til 18 virka daga. Apótek Lyfsalans í Glæsibæ er áfram opið frá 8.30 til 18 virka dag og í bílaapótekinu við hlið Orkunnar á Vesturlandsvegi er opið frá kl. 10 til 22 alla daga vikunnar.
© Aðsend mynd (AÐSEND)
