*

fimmtudagur, 27. júní 2019
Erlent 22. júlí 2015 08:35

Apple hagnaðist um 10,8 milljarða dali

Tæknirisinn Apple skilaði besta þriðja ársfjórðungi í sögu félagsins. Hlutabréfin lækkuðu samt í verði um 6,8%.

Ritstjórn
european pressphoto agency

Bandaríski tæknirisinn Apple birti uppgjör sitt fyrir þriðja ársfjórðung seint í gærkvöldi og hefur afkoman aldrei verið betri á þessum hluta ársins í sögu fyrirtækisins. Hagnaður fyrirtækisins nam 10,8 milljörðum dala og jókst um 38% frá sama tímabili í fyrra. Fjárhæðin jafngildir 1.460 milljörðum íslenskra króna.

Þriðji ársfjórðungur er vanalega sá slakasti hjá Apple af þeirri ástæðu að margir viðskiptavinir fresta því að kaupa sér nýjan síma þar sem stutt er í kynningu á nýjum Iphone.  Fyrirtækið seldi þrátt fyrir það 47,5 milljónir Iphone-síma á fjórðungnum sem er 35% meiri sala en í fyrra. Þá seldust 4,8 milljónir Mac-tölva og jókst salan þar um 9%.

Apple Watch fengið frábærar viðtökur

Tim Cook, forstjóri Apple, sagði á kynningu um uppgjörið að þessar niðurstöður væru ótrúlegar. Þá sagði hann nýja vöru fyrirtækisins, Apple Watch, hafa fengið frábærar viðtökur, en vildi ekki opinbera tölur um sölu þess af samkeppnisástæðum.

Sé hins vegar litið á sölutölur „annarra vara“ í árshlutareikningnum, sem Apple Watch og fleiri vörur falla undir, sést að salan þar jókst um 952 milljónir dala á milli ársfjórðunga og nam nú 2,6 milljörðum dala.

Þrátt fyrir góða niðurstöðu lækkaði gengi hlutabréfa hins vegar um 6,7%, en sérfræðingar segja ástæðuna fyrir því vera spá Apple um tekjuafkomu fyrirtækisins á næsta ársfjórðungi sem er nokkuð undir væntingum.

Stikkorð: Apple Tim Cook Apple Watch
25 ára afmælistilboð VB – 50% afsláttur af áskrift

Afmælistilboð VB

Viðskiptablaðið er 25 ára og af því tilefni býðst nýjum áskrifendum að kaupa áskrift á 50% afslætti.
Afmælisverðið er aðeins 2.500 krónur.

Tilboðið er fyrir nýja áskrifendur. Núverandi áskrifendur geta bætt við sig áskrift á þessu verði. Gildir í 4 mánuði. Áskrifendur fá Viðskiptablaðið, Frjálsa verslun og Fiskifréttir sent ásamt vefaðgangi að vb.is og fiskifrettir.is